I Sugih Teken I tiwas

Ada tuturan satua I sugih teken I tiwas
I sugih ia sugih pesan, nanging demit ajan ngajak anak lenan
Tur ia enggal iri ati, jail teken anak lenan
To mawinan tusing ada anak demen ngajak I sugih.
I tiwas buka adanne tiwas pesan
Nanging melah solahne tusing care men sugih
tusing demen jail ngajak anak len
Geginanne i tiwas tuah kealase ngalih saang
lakar adepe ka peken
Nuju dina anu I tiwas kumah i sugih ngidih api
ditu ngomong i sugih
"ih tiwas, alihin ja icang kutu !
Yen suba telah nyanan upahina baas"
I tiwas ngalihin kutun I sugihe.
Sube tengai mara suud.
I tiwas upahina baas acrongcong.
Ia ngencolang mulih, lantas baase ento jakane
I sugih jumahne masiksikan, maan kutu aukud
Nenggalang ia keumah i tiwas, laut ngomong kene
"ihh tiwas, ene icang maan kutu aukud.
jani mai ulihang baas icange i tuni"
masaut I tiwas " yeh, baase i tuni suba jakan tiang"
masaut I sugih " nah, ento suba aba mai anggon pasilih!"
nasine ane suba ngantiang lebeng ento juanga.
Kayang kuskusanne abana baan I sugih
nyananne buin teka i sugih laut ngomong
" ihh tiwas, i tuni bena nyilih api teken saang
Api teken saang icange ento patut manakan.
Jani mai aba panak apine teken saang icange ento!"
Ditu lantas api I tiwase juanga baan i sugih
Tekaning saangne apesel
gede masih juanga
I tiwas bengong ngenehang lacurne buka keto
Maninne I tiwas tundena nebuk padi baan i sugih
lakar upahina baas duang crongcong
i tiwas nyak nebuk kanti sanja mara pragat
upahina ia baas, laut encol mulih lantas nyakan
i sugih jumahne nyeksek baasne, maan latah dadua
Ditu encol ia kumah i tiwase
suba teked laut ngomong
"ihh tiwas, ene baase enu misi latah dadua
jani ulihang baas icang e
Yan sube majakan, ento aba mai"
Suud ia ngomong keto, lantas jakanan I tiwase juange
kayang payukne masih juanga baan i sugih
Sedek dina anu I tiwas luas ke alase
krasak-krososk ngalih saang
saget teka sang kidang tur ngomong
" ihhh tiwas, apa kaalih ditu?
masaut i tiwas tur nasarin pesan,
"tiang ngalih saang teken paku"
"lakar anggon apa ngalih paku?"
masaut i tiwas " lakar anggon tiang jukut"
"ih tiwas, lamun nyai nyak nyeluk jit nirane,
ditu ada pabaang nira teken nyai!"
Ditu lantas seluka jit kidang e
Mara kedenga, bek limanne misi mas teken slaka
Suud keto sang kidang ilang
I tiwas kendel pesan lantas mulih
Teked jumah ia luas ka pande
Nunden ngae gelang, bungkung teken kalung
I tiwas jani sugih liu ngelah mas slaka
Makejang pianakne nganggon bungah
magelang, mabungkung, makalung mas.
Lantas ia pesu mblanja
ditu tepukina i tiwas teken i sugih
ia jengis delak delik ngiwasin pianakne i tiwas
maninne i sugih ka umahne i tiwas metakon
" ih tiwas, dija nyai maan slaka liu?"
masaut I tiwas,
" kene mbok, ibi tiang ka alase ngalih lakar jukut
saget ada kidang nunden nyeluk jitne
Lantas seluk tiang ditu maan mas teken slaka"
mara keto i sugih ngencolang mulih
maninne i sugih ngamaluin luas ka alase
i sugih nyaru-nyaru buka anake tiwas
Ditu ia krasak-krosok ngalih saang teken paku
Saget teka sang kidang, tur metakon
"nyen ento krasak-krososk?"
masaut i sugih sambilang maakin sang kidang
"tiang i tiwas uli puan tiang tuara nyakan"
i sugih klebet-klebet bayunne kendel pesan
masaut sang kidang,
"ihh tiwas, mai dini seluk jit nitane"
mara keto lantas seluka jit kidange ento
mara macelep limanne, lantas kijem jit kidang e
i sugih pida abana ka dui duine
I sugih ngeling aduh aduh katulung-tulung
"nunas ica, nunas ica, lebang tiang!
Tiang kapok, tiang kapok"
Di pangkunge I sugih mara lebanga
ia pepetengan, awakne matatu babak belur
di subane inget ia magaang mulih
teked jumahne lantas ia gelem makelo
keto upah anake loba tur iri hati...